龍苑

呢個室內設計只取一個參照：一間好酒店套房嗰種華麗而不失舒適嘅感覺。成個單位會發光。牆邊同門框用上反光物料，將back-lit層架、天花嘅迷人燈效同大量射燈一一折射，成個空間因而盡顯華麗氣派。雲石貫穿全屋，由餐桌面去到茶水間嘅間隔牆；唔同時期、唔同風格嘅花瓶、藝術品同攝影作品共冶一爐，令空間充滿活力，而靠墊同吊燈嘅幾何造型，就將細節同層次再疊上去。

咁多反光面同較淺嘅主色調，其實藏住一個風險：成個單位可能會變到好似一幅褪咗色嘅相片。所以我哋將主調保持自然百搭，再以紫色點綴，營造一份隨性而優雅、啱晒招呼朋友嘅格調。書房入面，一張菊花圖案嘅巨型地毯，喺裸色調同反光效果之間大膽跳脫咁將個房提起。

小女兒嘅房間就刻意跳出酒店主題。呢度要嘅唔係華麗，而係舒適同溫暖，所以我哋用柔和色調，揀活動式傢具，留返空間畀佢隨住長大，將自己嘅喜好慢慢放入呢個房。